歌手許志安（安仔）身穿紅色西裝出席活動時透露，早前有幾日假期，即去了日本玩，他說：「係一個正常嘅假期，但肥咗好多返嚟，要努力操番先得。」問是否操肌準備開騷？安仔即宣布入紙紅館成功的好消息：「係呀！出年開，入咗紙，已經得咗啦！但未講得幾時住。（連謝霆鋒都爭唔到喎？）我係出年先開，對上一次喺紅館開已經係2015年，今次係相隔4年再開，我聽到呢個消息都好開心，我申請咗兩次先成功，希望可以做好啲，攞咗幾日期，所以開極都係得幾日。」

操肌要勤住做

安仔又笑言操肌不是為了開演唱會：「其實都想自己sharp啲同埋fit啲，因為有時都要拍廣告同埋工作，唔想因為開演唱會先嚟操，咁樣好似變咗工作咁，你知有時Paco（老闆黃柏高）會無啦啦話下星期有個角色啱我做，咁就已經唔關演唱會事。」問Big Four班好兄弟攞咗期做嘉賓未？他說：「太早喇，唔怕講埋啦，係下年嘅下半年先開。」