艺人胡定欣曾于节目《美女厨房》中惨受劣评，如今在新煮食节目《男神厨房》中反过来为男艺人评分，坦言感觉特别，笑说：“喺个咁Grand嘅场合，就算唔好食，吐出嚟都要有仪态啲，啲人话女仔要入得厨房出得厅堂，依家睇靓仔都要睇佢识唔识煮嘢食。（靓仔会加分？）呢个系视觉上嘅享受，我都希望渴求搵到咁嘅人，实在太耐冇食过男仔煮嘅嘢食。（搵男友都要呢啲要求？）我会努力，又靓仔又识煮嘢食，唔一定要好睇，依家好多男仔都好锺意煮嘢食，我可以系佢哋身上学。”

日前她与爸爸出动打网球，获网友赞爸爸又后生又弗，定欣说：“畀佢抢Fo添，嗰日系爸爸教我，佢都打咗一段时间，我呢排拍完剧休息紧，所以想搵一个运动可以一齐做，点知打一次就爱上，所以好想认真搵个教练学习。”谈到今年未有作品出街，不用为今届角逐视后而添压力，已是视后的她笑说：“都冇压力咗几年，但我嗰套《白色强人II》应该出年会播，依家做紧后期，慢工出细货嘛！（你啲好姊妹分别都有作品喎！）好锺意黄智雯同袁伟豪喺《把关者们》呢一对CP，系Die Hard Fans，佢哋萤幕上好登对（咁睇好边个拎视后？）今年仲有姚子羚、林夏薇，真系手掌同手背都系肉，好难拣。”