歐倩怡（Cindy）近年專注進修營養學課程，現時已成為專業營養師，所以一家四口喺屋企食得清淡健康，郭晉安坦言：「我哋健康到有時唔係幾好意思請人嚟我哋屋企食飯，因為我哋食到好淡，好怕人哋話『你畀啲咩我食呀！』」現年41歲的歐倩怡近日更在社交平台上載大跳椅子舞片段，身穿小背心及熱褲，大騷好身材！

歐倩怡小背心熱褲大跳椅子舞 兩孩之母保養勁好

歐倩怡（Cindy）於2006年下嫁三屆視帝郭晉安後，誕下一子一女，半息影做幸福人妻相夫教子，罕有現身幕前。歐倩怡近年專注進修食物及營養學課程，早前以一級榮譽的好成績學士畢業，現時已成為專業營養師。熱愛運動的她近日更於社交平台上載自己跳椅子舞的短片，41歲的她穿上小背心及熱褲，兩孩之母身材超fit！

歐倩怡郭晉安食得清淡 安仔：唔好意思請人嚟屋企食飯！

歐倩怡（Cindy）同56歲嘅郭晉安結婚14年，婚後誕下一子一女，老婆歐倩怡一直相夫教子外，依然好學不倦，近年專注進修食物及營養學課程，早前以一級榮譽的好成績學士畢業，現時已成為專業營養師，所以一家四口喺屋企會食得好健康，郭晉安早前接受訪問時坦言：「其實我哋真係好健康，我哋健康到有時唔係幾好意思請人嚟我哋屋企食飯，因為我哋食到好淡，好怕人哋話『你畀啲咩我食呀！』我哋會食啲好新鮮嘅嘢，我哋食當日喺街市買嘅嘢，好簡單，以蔬菜為主，菜我哋唔落鹽又唔落油，真係劈嚿薑落去，烚熟就食。細路仔又唔會扁晒嘴嘅，佢哋都習慣咗。習慣到有陣時唔鍾意出街食，因為覺得好鹹，要搵水再沖，出去食佢哋會鍾意食西餐，食沙律、比較清啲嘅嘢，佢哋會接受啲。」郭晉安又透露太太間唔中都會親自下廚：「好間唔中，有時都係交畀工人煮，但係如果佢煮，同一樣嘅嘢，佢煮嘅味道真係好出色！由佢唔識，開頭煮碟雞出嚟又鹹又苦，到依家煮得好好、好好食。」

郭晉安 同子女關係似朋友

問到演藝上、生意上仲有咩想做？現年56歲嘅郭晉安三句不離家庭：「我唔諗㗎嘞，譬如我盤生意都有我家姐睇住，我係做代言人，生意上嘅嘢我唔需要去諗，將來下一步要做啲咩呢，我會希望睇到我啲小朋友成長、讀大學，佢哋依家仲係細，有好多嘢都要自己珍惜嘅，珍惜當下呢刻，我先至希望一步一步咁去做。」問佢係咩類型嘅爸爸？惡定唔惡？同仔女關係係咪好close？郭晉安答：「依然都係一個好朋友嘅關係，我唔嚴厲嘅，有商有量，當然如果佢哋控制唔到自己情緒嘅時候，我有方法令佢哋calm down，但係都唔嚴厲嘅，唔會令佢哋覺得好驚，大家係有傾有講、商量嘅。但某啲情況， 佢哋係冇得決定，譬如旅行plan去邊，係由我去決定，呢個鍾意去睇公仔，嗰個想行玩具店，如果唔係就好混亂㗎嘞，呢啲嘢我會話畀佢哋聽，佢哋無得去揀。」

仔女讀完書可入行

睇唔睇到仔女有演藝潛質？如果佢哋話入行，會唔會支持？郭晉安直言：「點都要讀完書先啦，阿女好啲嘅，阿女真係好鍾意跳舞，到依家都無放棄過，同埋好鍾意唱歌，但係我哋盡量喺屋企都好少表演，譬如我要登台，我等佢返咗學，我先練歌，佢原來從來都唔知我識唱歌。我登台啲歌佢無聽過，最近唯一同佢玩過一次，同佢合唱一首我即將登台唱嘅歌，佢好有興趣，發現佢係好鍾意表演。阿仔就好鍾意睇我拍戲，之前復活節嘅活動，就係帶佢睇我拍戲，佢好鍾意食我個飯盒，佢話個飯盒好好食，哈哈！佢好鍾意喺現場睇到一班人集中去做一樣嘢，可能引發佢第日鍾意做幕後囉！或者幕前都得？唔知呀，我好自由嘅，我唔會刻意唔畀佢哋入行，但我嘅原則係要佢哋完成學業先。」有冇畀仔女睇自己啲作品？郭晉安笑言：「無呀，睇過一集咁多，嗰套係我做清裝，因為我想佢哋了解吓有清朝呢個朝代。佢哋讀嗰啲國際學校無呢方面嘅知識。佢啲同學反而有睇我嘅劇，同佢哋講：『你爸爸最近做衰人呀！你爸爸會殺人㗎！』哈哈！佢哋都係大個咗慢慢先分析到。同埋佢哋最近都會有啲要求嘅，譬如話『我髮型上應該要改變一下，唔想影到我嗰張相畀啲同學笑我個髮型。』開始有自我嘅形象。」

迫老婆拍拖

而講到夫妻相處之道，郭晉安透露：「我成日都聽到外面啲人會有一啲婚姻嘅危機，我自己都會審視吓自己。大家會覺得郭晉安同歐倩怡喺娛樂圈係一對模範夫妻，好似好穩定，有仔有女，好幸福家庭，其實呢個係外殼，裡面其實真係引申到好多問題，而呢啲問題係需要溝通，係嚟自生活、各自諗方法、為小朋友諗嘅嘢，我點樣睇佢、佢點樣睇我、我以為佢係咁、佢以為我係咁，當如果無溝通，久而久之，慢慢累積，有一日發現原來我對佢嘅諗法好陌生，當我哋大家搵張紙寫以為對方點嘅時候，發現原來唔係咁，譬如我以為佢鍾意啲咩，佢鍾意嘅唔係咁。開始覺得每個禮拜要抽一啲時間，大家去傾偈，去番拍拖時曾經去過嘅地方，繼續keep住去溝通、去傾、坦白。」會唔會放低小朋友去拍拖？安仔表示：「會呀，不過媽媽唔係咁主動嘅，媽媽始終個心係喺小朋友度，有陣時我要夾硬迫佢，話畀佢聽小朋友大㗎嘞，唔好再當佢好似細路仔咁，可以擺低佢哋畀工人湊住就得㗎嘞。」

鄭丹瑞女兒鄭瑤（Zaneta）和鄭珉（Amanda） 從英美大學學成歸來，成績好，性格又獨立。鄭丹瑞向來是娛樂圈出名的顧家好男人，與太太結婚逾30年仍然恩愛如初，雖然二人已是老夫老妻，但是時不時都會被拍到旦哥與太太十指緊扣逛街，絕對是寵妻的好老公！

鄭丹瑞女兒姊妹同房 自己解難

丹瑞女兒鄭瑤（Zaneta）和鄭珉（Amanda）從英美大學學成歸來，成績好，性格又獨立，原來是鄭太從小培養的！鄭太從小就教她們自己解決問題，「細個有次大女與同學發生問題，同學個家長誤會咗，大女同我解釋之後，我叫佢自己打俾個家長講番，但佢想我代佢講，我話唔得，因為呢件事係你哋之間嘅誤會，如果個家長都係唔明白的話，你先搵媽咪。卒之佢打俾個家長講番，事情解決咗，佢學識點解決問題之餘，自信心亦大咗。當人與人之間有誤會，你用正面態度去講番，對方都應該會明白。」

這亦正正解釋到，為何鄭太堅持要兩個女同一睡房，開心一齊笑，鬧交就自己解決，令兩姊妹感情非常深厚。Zaneta和Amanda異口同聲笑說：「我哋有問題會大吵大鬧，瞓喺碌架床都仲鬧：『I hate you Amanda！Shut up Zaneta！』但我哋始終同一間房瞓，日日都面對大家，好快就做番好姊妹，媽咪都叫我哋要攬番大家。」

晚晚返屋企食飯

旦哥以四個字形容屋企關係：家嘈屋閉。「係positive嘅家嘈屋閉，啲女成日整蠱阿媽，阿媽又搗氣，大家成日廢話一輪。我覺得有咁嘅屋企仲想點啫？人生道理，佢要聽已經聽咗，一路以來我同老婆只可以用身教，俾佢哋睇到一個家庭係點，知道我點努力做嘢。」

旦哥謝絕應酬，每晚返屋企食飯，利用晚飯時間維繫家庭，了解孩子。「我老竇都係晚晚返屋企食飯，阿媽都好嘢，每晚都有唔同菜式，到我依家都係晚晚返屋企食飯，十點瞓覺，個女咁大都想晚晚見，前世情人吖嘛！」
他希望女兒承傳鄭家「晚晚返屋企食飯」的傳統，延續family bonding，「冇咩特別哲學，就係一家人齊齊整整，食個飯，嘈喧巴閉，咁就得喇。以前做嘢好大壓力，供書教學，返屋企會發脾氣。依家？我冇晒脾氣，唔想做咪唔做囉，係時候去享受家庭樂。」

女兒學成歸來 鄭丹瑞 : 老婆管教有方

女兒Zaneta和Amanda已分別28、27歲，從英美大學學成歸來，成績科科A，但兩人皆非讀「賺錢」科目，Zaneta在美國賓夕凡尼亞大學讀政治及英國文學，Amanda的科目更冷門，在英國倫敦大學學院讀考古。年前旦哥一篇女兒去考古的文章，成為教育潮文，久不久就被網民「翻loop」。旦哥夫婦明白人要搵食，但寧願女兒慢慢咀嚼，先餵飽靈魂。鄭太從小就教好女兒道德觀、自立及自學精神，培養她們成為一個有獨立思想，有靈魂的人。

國際學校功課一樣多

90年代初兩女出世不久，旦哥便舉家移民加拿大，1998年回流返港，兩女入讀德瑞國際學校，完成中小學。傳統本地學校出身的鄭太未曾接觸過國際學校，欣賞德瑞的新穎教法，鼓勵女兒多向媽咪分享，「我話你哋喺學校學緊嘅嘢，可能我都未學過，我已經讀完書，不如你哋教番媽咪啦，佢哋講得好開心！」

Zaneta聞言即為國際學校的學生平反，功課量絕不輸本地學校，學生競爭之大更是國際級。「我哋嗰陣都做到半夜兩三點，一樣要考試，我哋唔只同香港學生鬥入香港嘅大學，係同全世界鬥入好嘅美國、英國大學，如果入唔到一間好嘅大學，喺學校會被視為失敗，所以壓力都好大，唔勤力考多啲A點入到。」鄭太指德瑞教到學生自發向上，重紀律，惟中文教簡體字，要從課外書補充繁體字知識。

兩女在外國讀書期間，鄭太也不時飛去當地探望。

鄭丹瑞與太太結婚38年恩愛如昔

旦哥因為主演廣播劇《小男人週記》的阿寬而出名，參演過多部影視作品，亦憑著出眾的口才主持過不少節目，如《勁歌金曲》及近年的《活得健康嗎》等等。

旦哥的太太「沙律」原來就是他讀書時期的初戀情人，二人即使相戀多年及育有兩個女兒，但平日仍然過得非常 sweet，兩人一起互相扶持至今。旦哥曾經說過太太一路上給予他很大的支持，亦指老婆是唯一可以治到他的人；在他經歷生命中的高高低低的時候，太太每次都會在他身邊鼓勵自己，讓他沒有後顧之憂。

不過作為一個男人，旦哥亦坦承自己也會有軟弱的時候，都會有喜歡其他年輕女生的時候，但是他清楚明白那只是男人的幻想，絕對不會為了一時衝動而失去了一生中的最愛。

專訪鄭丹瑞：最想屋企「家嘈屋閉」！

鄭丹瑞 （旦哥）與老婆相識43年，結婚38年，兩人的相處之道是互相忍讓、互相尊重，鄭太明白丈夫偶爾工作不順，會帶情緒返屋企。「如果佢脾氣係可以理解，就忍下佢先，下咗道氣先問番佢點，好似朋友咁傾偈，如果傾唔埋就忍咗算囉。」雖然兩公婆好少嗌交，但旦哥反而最想屋企「家嘈屋閉」！

鄭太笑丈夫發脾氣個樣好難睇，後生未結婚前也是如此，「等佢下氣我就做番個樣俾佢睇，知唔知你頭先咁醜樣呀？下一次佢就會收斂吓。」兩人有小朋友後，旦哥盡量不會在小朋友面前表現醜態，自覺返入房。

屋企必須有愛

自有小朋友之後，旦哥忙於工作賺錢養家，鄭太主力管教女兒，對大女稍為嚴厲，希望她能做好榜樣給細女。曾當中小學教師的鄭太深信，想女兒健康快樂成長，家中必先有愛，才能做好溝通及教育。「一家四口八隻腳，大家要互相體諒、相親相愛。當小朋友唔開心，就慢慢同佢溝通，代入番小朋友個年紀去諗佢處境，一齊解決。」

鄭太對人的處事方式一直以對方為先，助她廣結友緣，再應用家庭上一樣奏效。「好似我同你傾偈，我都會諗你先，你希望我哋個訪問點樣？我再去配合你。正如小朋友有咩需要，我就代入佢，從佢角度去諗，就唔難理解佢需要啲咩、嬲緊乜嘢。」

對小朋友愛的定義，各有睇法。鄭太的定義為，讓小朋友因感到被愛而開心，當有愛做後盾，即使父母不在身邊，小朋友都能獨立，恆久地走下去，遇到困難亦能處變不驚地解決。「俾佢開心，唔係佢想玩就俾佢玩，佢想自由就俾佢自由嗰種，係要從心而發去愛佢。」

讀書須尊師重道

無論讀哪一間學校，鄭太對孩子的要求非首重成績，而是尊師重道。「返學一定要尊敬老師，聽老師話、嗌早晨，唔可以有任何不敬態度，呢一點好重要。可能我同以前老師仲有聯繫，個女就睇到原來學生可以同老師關係咁好，將來可以成為朋友，所以佢哋覺得老師係好好，返學好似返屋企咁，教乜嘢都容易接受。」

課餘她們最愛看書，一本Harry Potter兩姊妹輪流看，每人四小時一日看完，沉迷書本的程度猶如細路打機不離手，食飯都要看書，父母要勸她們「食埋飯先睇啦！」鄭太從小帶她們到書局，讓她們自行選擇，培養了她們的閱讀習慣。Zaneta指小時候受到Roald Dahl作品《Matilda》的啟發，書中的女主角5歲已看完兒童圖書館的藏書，6歲開始看成人館藏，「我都想好似佢咁！我開始喺學校圖書館入面由A睇到Z，全部書都睇晒，之後就可以睇成人部。書係有種魔力，有好多選擇，去到邊都睇得，加上以前冇internet，但我依家一樣搭車會睇書，行路都睇到。」

餵飽靈魂比賺錢重要

Zaneta經努力之下，IGCSE摘下11個A升讀美國賓夕凡尼亞大學（University of Pennsylvania），主修政治及英國文學，學習世界不同議題，她最希望了解到自己在世界上的位置。「我想領悟呢個世界發生咩事，我個位置喺邊？我係一個點樣嘅人？讀讀吓我發覺政治講唔到俾我聽，之後我上咗堂莎士比亞，喺一個話劇入面佢講咗一句：人只係海嘅一滴水。我哋喺世界嘅地位係點，我覺得文學仲清楚講到俾我聽，因為文學仲要知道作家寫時嘅政治氣氛，所以我揀埋讀文學，最開心功課係要求每星期睇故事書，有時仲可以揀睇戲，原來戲係可以另一角度欣賞嘅。」

Zaneta之後到英國攻讀莎士比亞歷史系碩士，進一步領悟這位大文豪。為賺錢而讀書，還是為滿足靈魂而讀書，各取所需。旦哥夫婦寧願女兒餵飽靈魂，旦哥曾道出，「人生而要搵食，這個當然。但也有很多種『食相』，有人狼吞虎嚥，甚至食埋隔籬嗰份，結果人吃飽了，卻餓死了靈魂。我寧願我的女兒慢慢咀嚼，先餵飽靈魂。」兩個女都做得到了，細女Amanda亦考入英國倫敦大學學院（University College London），卻揀選最小眾的科目「考古」，一度惹起家長間談論。

考古搵到工

Amanda笑言，當初選科未清楚方向，曾考慮過歷史，但怕將來工作死板坐office，不如「考古」四出挖掘，可以飛來飛去。「讀考古係好玩，但我都知道搵工難好多，讀完睇吓有冇機會用囉，考古訓練到我好organized、好detailed， 可以擺入其他工作度。」Amanda返港後已找到工作，擔任旅遊節目的製作助理，繼續飛來飛去！
2013年旦哥寫了一篇潮文講細女讀考古，當時Amanda讀Year 2，到Year 3文章又被瘋傳，「我有朝起身突然收到幾十個messages，『喂，點解facebook有篇文講你嘅？』我係睇過篇文嘅，有提到難搵工，其實讀邊科都難搵工，就算醫生、律師都好大競爭，仲勁過我想做嘅工啦，不過我可以做嘅工種少啲。」她有考慮過找回考古工作，但香港只有政府有考古，主要坐office工作，好少外出機會，「似做PR多過做考古。」

去以色列考古實習的一段經歷教她最難忘，在打仗中挖掘歷史，「掘咗兩三星期後，以色列打仗好多爆炸聲，成日聽到響鐘聲叫人去安全地方匿埋，凌晨三點都要起身。其實整個經歷都唔太驚，因為啲炸彈唔喺我哋附近落地，又冇見到炸過嘅地方。」

兩姊妹畢業後沒打算留英發展事業，選擇返港回父母身邊，在港工作吸取經驗，再作打算。Zaneta說：「喺英國我同妹妹一齊住，我做過一陣時裝雜誌，但佢哋冇錢繼續留我，而我又好掛住爹哋媽咪，婆婆都90歲喇，所以我想返嚟陪佢哋一陣。」她有位比利時律師男友，但現階段不想在比利時發展，現正在香港一本時尚雜誌任時裝記者。「我覺得文字同著衫都係一種溝通方法。」

旦哥夫婦原以為兩個女鬼妹仔性格，畢業後會在外國落地生根，豈料兩女愛回家，旦哥覺得自己賺咗。「我話過你哋鍾意返嚟又得，喺邊搵到食就最好啦，佢哋諗清楚後都係想返嚟攞經驗先。本來冇期望佢哋返嚟，呢兩年突然返嚟身邊，係好開心。」

現在一家四口的關係像朋友，話題比以前更闊，女兒亦不再是小女孩，旦哥樂得輕鬆。「夜晚唔使再提佢哋考試溫書，聽日要返學。佢哋已經大個女，有自己工作、生活，但又住埋一齊，呢種感覺係未試過，以前係我take care佢哋，依家等佢哋take care我，好似今日做完訪問，家姐今晚煮飯俾我食。」