TVB新剧《致命复活》已经开播，由郭晋安，万绮雯主演。亦系今年最期待嘅郭晋安演出。

套剧讲郭晋安被人陷害囚于荒岛十年，逃出生天后踏上复仇之路，斋睇牌面、时间，都系台庆攞奖格局，甚至可能令郭晋安第四度问鼎视帝。

《致命复活》预告片

▼▼▼

其实郭晋安，无论系饰演好单纯好不做作嘅阿旺，定系奸到令人心寒嘅「忠奸人」都入型入格。

亦忠亦奸都完全无难度嘅佢，可以话系：慢慢变奸又得，立即变奸亦得：

《创世纪》—— 马志强

郭晋安饰演三大男主角之一嘅马志强，佢同好友叶荣添及许文彪一齐发展地产生意，成为百亿富豪。

虽然喺罗家良及大奸大恶嘅陈锦鸿身边，难免被抢咗唔少戏份，但剧中佢嘅忠直纯良，乐于助人性格，形象入屋讨好，知悉父母被杀真相嘅佢，声嘶力竭闹许文彪，令人戥佢难过。

而去到《创世纪II天地有情》，最后同蔡少芬成为一对，养育三名子女，大团圆结局。

《戆夫成龙》《阿旺新传》——丁常旺

2002年嘅民初喜剧《戆夫成龙》，讲郭晋安饰演嘅丁常旺，因头部受伤而变成智障人士，智力停留喺7、8岁，被丁氏夫妇收养照顾，其后娶咗宣萱做老婆，充满童真嘅对白，令人会心微笑。

由于阿旺呢个角色好受欢迎，郭晋安不但首度成为视帝，而且喺2005年再开拍时装版《阿旺新传》再攞视帝。

《与敌同行》——唐立言

之前，郭晋安多数饰演善良角色，而去到2008年嘅《与敌同行》，郭晋安嘅角色开始慢慢变奸……

剧中郭晋安杀人后嫁祸俾老表郑嘉颖，令对方坐咗十年冤狱，而郑嘉为咗查出真相，加入咗郭晋安做老板嘅公证行。

表面上郭晋安系正人君子，对出狱后嘅郑嘉颖非常照顾，但当佢发现被人调查时，就开始表露出佢奸诈真实嘅一面。

其中一幕将患有柏金逊症嘅养母吕珊用力抛落地，角色相当出位，而最后虽然入狱，但佢一直未有反省，更阴森森咁表示要报仇，令人不寒而栗……

《忠奸人》——高哲行

2014年嘅《忠奸人》，郭晋安成功挑战亦正亦邪嘅角色。

剧中郭晋安饰演坐轮椅嘅律师高哲行，因吴卓羲追捕劫匪时被误伤，导致双脚瘫痪，人生即起咗翻天覆地嘅变化。

重遇吴卓羲之后，表面上佢同对方成为咗好友，其实一直伺机报复，更利用对方将商场上嘅敌人一一除掉。

最后佢嘅真面目被揭穿，但为咗留住田蕊妮饰演嘅谭美贞，最后佢选择咗自首入狱。但其实从未真正谂过要改，结果一直都呃住大家……

而郭晋安呢个亦忠亦奸嘅出色演技，为佢第三度赢得台庆视帝。

当然啦，除咗以上剧集，郭晋安仲有近年《老表》系列、《古灵精探》系列等等好戏。

咁大家又钟意睇佢做「忠」嘅郭晋安，定系「奸」嘅郭晋安呢？

金句王

微信号：jinjuking

睇金句王，爽过去爆房！
每日发布粤港澳第一手开心嘢！
粤语 | 爆笑 | 搞嘢 | 吹水 | 抵死 | 顶瘾

欢迎搭讪 投稿都啱 合作更赞 小编微信: KingKingGuy