呢期TVB新剧《一屋老友记》好热，既有高收视，又有高人气多话题。小编日前都出文讲过《《一屋老友记》秒杀《琅琊榜》！TVB地头虫打赢过江龙！》《由细睇到大！欧阳震华9大经典剧集！》，今次同大家讲下因为《一屋老友记》而再次弹起嘅滕丽名，佢演技好已经唔使多讲。但入行21年嘅阿藤，其实都经历过好多好多～

滕丽名嘅成名代表作一定系《陀枪师姐》。当年「陈三元」被老强一幕更加系经典，睇到人心噏！由98年第一辑嘅《陀枪师姐》开始，阿藤做到04年第四辑，「陈三元」由单身汪到结婚生仔，到后尾被老强、经历丧子之痛，最后连个老公都失踪埋，真系惨到冇朋友！

《陀枪师姐》既系阿滕嘅代表作，亦令佢识到一个足足浪费咗佢9年青春嘅魏俊杰！两人98年开始挞着，甚至到咗谈婚论嫁嘅阶段。不过可惜07年佢哋突然传出分手消息，第二年，即系08年，魏俊杰就即刻娶咗内地女大学生张利华，被好多人插爆系世纪贱男，贪新忘旧！

被魏俊杰浪费咗大拉拉9年青春之后，阿藤继续贯彻古乳有晕：「人生总会遇上几个人渣」嘅宿命——07年再遇上另一个贱男郭政鸿！当时两人拍紧《野蛮奶奶大战戈师奶》并且挞着咗。而郭政鸿当时隐瞒咗自己已婚并且有个女，而同阿滕拍咗2年拖，直到后尾阿藤有所发现，先至喺09年7月由阿滕宣布分手。

当大家都以为阿滕条命生得唔好嘅时候，好在佢终于揾到个好老公！13年同金融才俊朱建昆拉埋天窗，成功嫁出！婚后阿滕经常孖住老公周围飞，一年去几次旅行，滑雪潜水打golf乜都玩一餐！幸福到爆！真系应咗个句古乳有晕：「守得云开——滕丽名！」

【同场加映】

讲咗Bobby，又讲埋阿藤，当然唔少得讲下呢度「波藤」组合拍过嘅好戏啦，等小编带大家时光倒流18年先：

1998年《陀枪师姐》

喺1998年，Bobby（饰陈小生）同当年22岁嘅阿滕（饰陈三元）合作拍摄《陀枪师姐》，佢哋两个饰演叔侄，而阿滕喺剧中凭住男仔头外表、进步神速嘅演技一炮而红，成为佢嘅代表作，当时佢仲同对手魏骏杰擦出爱火！而《陀枪师姐》气势如虹，喺6年间一共拍咗4辑，有啲主角已经冇拍，但佢哋两个4辑都有拍晒！而阿滕仲喺剧中俾色魔老强咗添呀！讲开又讲，《陀枪师姐》一定要连煲4辑，唔可以断咯！

2003年《洗冤录II》

喺《陀枪》之后，其实佢哋系再有合作嘅，并唔系到《老友记》先再聚头！喺2003年，同系由Bobby仔领军嘅古装剧《洗冤录II》，阿滕都有参演！当年套剧最高收视有成46点，虽然佢哋对手戏唔算好多，但系又咁啱得咁桥佢哋有合作㖞，仲唔系有啲古怪？

2007年《胡雪岩的厨娘》

而又再相隔4年，Bobby同阿滕又有机会重聚！当时TVB喺2008年嘅节目巡礼出现过《胡雪岩的厨娘》宣传片，不过未有成事！如果最终有制作同播出街，相信又会掀起高潮！

2016年《一屋老友记》

唔经唔觉，嚟到今年喇！自言睇住好拍档阿滕长大嘅Bobby已经55岁，不过世事嘅嘢好难讲，佢哋竟然由当初嘅两叔侄演到变咗两兄妹，证明Bobby都Keep得唔错。虽然Bobby年纪有返咁上下，不过依然系「收视福将」，演技生鬼再加上再、再、再、再同阿滕合作，话咁易就成功制造热话啦！

咁Bobby喺2000年已经凭《洗冤录》获封视帝啦，又攞过几次「最喜爱的电视角色」喎，而阿滕演技咁好，一直都系差一啲啲，希望今年视后，佢有机会再次「守得云开滕丽名」啦！

金句王

微信号：jinjuking

睇金句王，爽过去爆房！
每日发布粤港澳第一手开心嘢！
粤语 | 爆笑 | 搞嘢 | 吹水 | 抵死 | 顶瘾

欢迎搭讪 投稿都啱 合作更赞 小编微信: KingKingGuy